Disko honetan pilatzen den aberastasuna, Peio Erramouspe AKA Haira-k Moï Moï kolektiboaren partaide edota hainbat proiektuen ekoizpenean pilatutako esperientziaren ondorio da zalantzarik gabe. Izugarrizkoa baita, hain iraupen motzean, Peioren doinuek erakusten duen helmen zabala eta anbizioa. Korg Poly 6 Sintetizadoreen azti bihurtuta dageneko, ederki zukutzen ditu erremintak ematen dion baliabide guztiak. Erraztasun txundigarriz eta naturaltasun osoz Jazz egitura konplexuetatik, techno-pop koloretsura edota kraut espazialeko trip-etara salto egiten du doinu batetik bestera eta batzuetan doinu berean. Hitzetan, Elizanbururen olerki klasikoak edota doinu tradizionalak bat egiteko gai da gainera. LP bikoitz baten doinu eta ideia adina entzun dituzula esango zenuke amaitzean. Baina ez, 5 kantu dira guztira. Ez gutxiago, ez gehiago, dotorezia osoz eta bere neurri egokienean. Hairak ez du gehiago behar liluratzeko baina noski gu gehiagoren egarriz geratu gera.
Lo siento, debes estar conectado para publicar un comentario.